熱度 2|
嚟到中國人最重視嘅農曆新年,相信各位國民都密鑼緊鼓咁準備緊過節嘅嘢!咁多嘢要準備,難免「忙中有錯」,所以小編整理咗個checklist,俾大家過年前檢查一吓有冇咩未預備好啦~
1. 換新鈔 + 準備利是封
已有家室嘅國民新年少不免要派利是,唔知大家準備好利是封同新鈔未呢?之前玩咗分享大「封」收嘅國民,嚟緊就可以用我哋BK嘅狗年利是封喇!
2. 大掃除 + 貼揮春
「年廿八,洗邋遢!」係中國人嘅傳統,有「去舊迎新」嘅意思。清潔過後,大多數人都會貼埋新嘅揮春,國民可以去bk首頁(www.baby-kingdom.com/forum.php)下載國王揮春,同國王一齊迎接新一年嘅到來!
3. 辦年貨
按照習俗,每個家庭都會準備一個寓意「十全十美」嘅全盒,放入各式各樣嘅賀年小食,款待嚟拜年嘅客人。而要去親朋好友屋企拜年嘅國民亦唔可以兩手空空,需要預備一份禮物,答謝人哋對你嘅招待~小編建議今年除咗送最常見嘅糖同朱古力之外,仲可以花啲心思諗諗收禮者嘅喜好,或者上嚟叫其他國民俾吓意見,就唔使搲到頭都爆啦!
4. 準備團年飯
準備下廚嘅jm留意喇~年三十當日街市一定人頭湧湧,可以的話儘早買定啲乾貨,提早預備就輕鬆好多啦!團年飯後亦唔少得要食返碗湯圓,寓意一家人團團圓圓吖嘛!
5. 齋菜 + 壓歲錢
想新年有個健康好開始,小編嘅媽媽年三十晚會準備一份齋菜拜完神之後食。食完齋菜,父母就會派壓歲錢俾小朋友擺喺枕頭邊,寓意可以平平安安咁度過一歲。
6. 行年宵
歲晚指定動作:行年宵!一家人食飽飽一齊落去行一圈,買返棵年花擺喺屋企,就一年到晚都咁有生氣啦!
7. 新衫新褲
細個最開心就係新年可以買新衫新褲,年初一梗係要著最靚嗰套衫去拜年啦!
準備好晒就可以過新年喇!若果大家有咩其他過年習俗,歡迎留個言話俾小編知!祝大家新一年心想事成,旺旺招財!