現在的玩具越嚟越多樣化，有極受男孩子歡迎的車，有七彩繽紛嘅積木，如果想玩玩具既同時又想提升語言發展，究竟揀咩玩具先最適合呢？係咪只要買小朋友鍾意嘅玩具就可以？ 今日就同大家分享最經濟實惠又可以提升小朋友語言能力嘅玩具啦！因工作關係，我經常都要到處搜羅不同的玩具作治療用途，究竟言語治療師會大推咩類型的玩具呢？
1. 煮飯仔
嫌廚房玩具又貴又哂位？其實買個簡簡單單既煮飯仔玩具已經可以達到同樣效果！
簡單做到「切、煮、食」就可以了，由食物單詞到句子「我用刀切酉瓜」、「我煎牛扒俾公仔食」都可以做到。
2. 公仔沖涼
沖涼食飯都是小朋友每日必做既事，何不叫他幫公仔沖涼順便學下相關詞彙呢？
學習運用適當的工具再加上動作，又可以學埋身體部位，一舉幾得。如用毛巾抹身、沖完涼就梳頭。
3. 洗衣機
玩具家品電器類既玩具都係我同好多小朋友嘅至愛，
最近仲出到連氣炸鍋玩具都有，唔想咩都買晒嘅話，我會推薦洗衣機玩具，
首先可以學衣物類詞彙，如衫褲鞋襪等，洗完仲可以學埋「掛衫、燙衫、摺衫、著衫」，真係夠哂百搭。
4. 汽水機
一部汽水機可以教乜嘢？
從小教導小朋友用錢總有好處，由問大人攞金幣、入錢、揀飲品、攞飲品，
小朋友會學懂飲品名稱和掌握箇中的因果關係，先要入錢才可以買東西。
5. 吹泡泡
吹泡泡好多小朋友都愛玩，但如何做到有更多互動呢？
家長可以同小朋友一同玩，由家長負責吹，動作和口語示範不同的動詞，
如「吹波波、篤波波、踩波波」或藉着抱泡泡學習不同的方位詞，如「泡泡係你頭喺上面啊」等。
希望今次的分享對大家有幫助，如果家長都有其他玩具推薦不妨喺下面留言。
嚟緊都會繼續有關於小朋友語言發展的文章，有興趣嘅話記得留意更新，謝謝！下次見。
