少年成長今日: 0|主題: 15859

收藏本版

回覆發帖

返回列表

跳至頁

查看: 8252 | 回覆: 0

表白 [複製鏈接]

csir3290

子爵府

積分: 10986

1^#

發表於 24-4-14 11:53 |顯示全部帖子 |倒序瀏覽 |打印

早幾日喺度碌緊手機嘅時候，見到有篇報道講話有個四年班嘅女仔打電話上電台同電台主持講話暗戀個六年班嘅男仔，希望電台主持可以幫佢打電話畀個男仔，等佢可以直接同個男仔表白。咁啱呢個電台節目直播嗰日，我同老婆揸緊車都咁啱一齊聽到呢個節目。我老婆當時都話有冇搞錯，咁細個已經打電話上個電台度話鍾意人，成個節目我哋都有聽曬，其實個主持都有同個小妹妹講，叫佢分清楚乜嘢叫做鍾意同埋愛，仲同個小妹妹講可以鐘意人但唔好拍拖住。點知個妹妹講嘢頭頭是道，講到又寫情信又點樣鍾意個男仔。最後主持見到個小妹妹咁有誠意，所以都有幫佢打到畀個男仔。個男仔喺個電話度都講到自己未可以handle到，所以拒絕個小妹妹嘅愛，但最戲劇性嘅係個男仔最後嗰句原來佢話因為佢心目中都已經有另外一個人。

而家嘅細路仔真係早熟得緊要，以前話中學生不應談戀愛，原來而家係小學生已經開始想談戀愛。個主持都有問過妹妹，佢家長知唔知道，個妹妹話原來佢都有同家長講，但係家長就係只係話畀佢聽叫佢畀心機讀書唔好諗咁多嘢，亦都唔可以咁細個拍拖。喺呢度亦都帶起咗一個討論，就係究竟家長應該點樣面對讀緊書嘅細路仔拍拖嘅問題。呢個問題好多家長都可能會遇過，尤其是好似我咁，我自己都有個女，唔知點解特別擔心個女會早拍拖。但係相反，對個仔有冇咁擔心嘅。其實如果係覺得讀緊書唔應該拍拖，就應該仔女都一樣，但係唔知點解對個仔就硬係冇咁擔心。喺個電台節目度主持都有講到究竟家長要開放啲咁去接受呢個問題，定係只係一律講唔準就可以呢！其中有個主持提到如果係佢嘅話，佢就會好開放咁同個細路傾呢個問題，亦都知道冇得阻止，所以佢寧願叫自己個女帶個同學仔上屋企食飯，等佢認識下佢個女嘅所謂對象。因為佢寧願開放啲知道件事，同認識埋個男仔，咁就可以喺相處嘅時間睇住佢哋嘅發展，總好過只係一句唔準然之後個女乜嘢都瞞住唔講，甚至乎講大話呃住佢哋，到萬一有問題出現嘅時候先至處理就太遲！

其實我絕對同意呢個態度，我絕對明白家長當然唔想細路仔咁早拍拖，但係有陣時事情要發生，亦都唔係家長可以事事都控制到，自己喺讀書嘅時期亦都見過自己嘅同學拍拖，最簡單就係同家長講辦去圖書館溫習，其實就係同咗個女仔去拍拖，佢哋嘅家長當然唔知道啦！而且因為怕被發現而用盡方法去呃住自己嘅家長。亦都聽過自己嘅同學講，當年試過個女仔嘅家長打電話去學校投訴，話個同學成日約佢個女去街，搞到又要見家長好似好大件事咁。但係我見佢哋最終咪又係繼續拍拖，只不過係將件事冚得夠更密，好彩當年我呢個同學最終都冇事發生，慢慢升班之後咪又係分左手。當年佢哋嘅父母做咁多嘢都唔能夠令到佢哋分手，反而只係令佢哋行得更埋，但相反佢哋啲家長以為佢哋冇拍拖之後，佢哋慢慢因為其他原因而平靜地分手。呢啲可能就係細路仔經歷嘅反叛期，以為經歷壓力就更加要堅強咁頂住，咁先至顯出愛情嘅偉大，所謂嘅壓力越大反抗力就越大。所以我好同意主持人所講作，為家長寧願知道認識同埋相處，慢慢睇住事情嘅發展，亦都要畀佢哋知道家長嘅底線，當然唔可以出事，亦唔可以影響讀書。而且因為家長態度開放啲，當仔女遇到問題嘅時候亦都會容易啲同家長講同家長求助，而且因為家長一路都睇住佢兩個嘅發展亦都可以從中灌輸正確嘅價值觀。

如果家長想避免仔女咁細個拍拖談戀愛，更重要嘅係自細就要畀到仔女足夠嘅愛同關注佢哋，亦要慢慢開始灌輸正確嘅價值觀，盡量多啲同佢哋傾計溝通，了解佢哋嘅諗法。咁樣先至可以減低佢哋過早拍拖嘅機會。如果仔女細個時冇做到預防，萬一發展到真係想拍拖嘅時候，就真係唯有要開放啲同佢哋傾。總之去到事情已經發生咗嘅時候，如果作為家長嘅我就寧願知道同接受，都總好過逼到仔女事事隱瞞，用盡方法呃住自己。到萬一有問題發生嘅時候想補救都已經太遲。