少年成長今日: 0|主題: 15852

收藏本版

回覆發帖

返回列表

跳至頁

查看: 9268 | 回覆: 2

體驗活動 [複製鏈接]

csir3290

子爵府

積分: 10959

1^#

發表於 24-4-7 11:40 |只看該作者 |倒序瀏覽 |打印

臨放復活節假前一日阿女放學返嚟好興致勃勃咁講佢嗰日嘅活動，原來嗰日係佢學校嘅全方位學習日，學校安排咗佢哋啲同學去深水埗參觀。活動前一日，其實阿女都有講，仲話深水埗有乜嘢好參觀，又話驚熱死。我哋都估應該就係帶佢哋去行下鴨寮街或者係啲認識深水埗社區嘅導賞，因為而家啲學校都好興帶學生去認識下啲社區。阿女學校雖然唔係喺深水埗，但因為距離學校比較遠，所以學校就諗住帶佢哋去認識下深水埗呢個社區啦！點知阿女返到嚟興致勃勃咁講話原來我哋全部都誤會咗，雖然係去深水埗，但阿女話其實個活動係由社工帶佢哋去睇嘅並唔係去深水埗市區入面，反而係帶咗佢哋去近住深水埗泳池附近嘅一條行人天橋同埋行人隧道附近，原來係帶佢哋去睇下深水埗嘅露宿者情況，阿女話去到條行人隧道度見到，成條行人隧道入面都有好多露宿者以嗰度為家，一個個好似搭曬啲帳篷咁，一開始行仲見到有個人瞓咗喺度冇曬反應，阿女話開頭都有啲嚇親，但係同行嘅社工同佢哋講話呢個應該係啲啱啱吸咗毒嘅露宿者，阿女話因為驚唔知嗰個人係咪死咗，所以啲社工都有埋去睇過。阿女話成班行過條行人隧道之後，社工同佢哋做咗啲講解，跟住就帶咗佢哋去附近嘅公園，仲請咗個曾經吸毒嘅人同佢哋做分享，講返佢自己嘅經歷。除咗了解吸毒者同埋露宿者嘅經歷之外，個活動仲帶佢哋去睇啲劏房，然之後阿女仲話啲社工叫阿女佢哋自己根據啲街招，打電話去啲劏房嘅業主度扮租劏房，了解吓而家究竟租一個劏房要幾多錢。阿女好有興致咁話，佢打通咗幾個電話先知道原來而家唔只有劏房租，連一個床位都有得租，佢仲可以話到畀我聽原來床位都仲有分就咁一個床位同租碌架床嘅床位，碌架床嘅租金仲會貴啲添。阿女話佢覺得個活動好有意義，可以見到好多佢冇諗過會見到嘅情況。

其實我都好贊成學校搞多啲呢類嘅活動，因為好似我個女呢個階層嘅學生，其實比較少機會接觸到社會好基層嘅情況。講真而家我哋都好保護自己嘅細路仔，而且可以嘅話都盡量提供最好嘅嘢畀佢哋，相比起我哋自己呢一代，其實而家嘅細路仔真係幸福咗好多，好多嘢都好容易得到，畀佢哋多啲了解唔同階層嘅情況，培養同理心之餘仲可以令佢哋更加珍惜而家所有嘅嘢。佢呢個活動更加好嘅地方，我覺得就係除咗帶佢哋睇之外，仲會請曾經吸毒嘅過來人同佢哋傾計分享，講真我覺得冇嘢畀真真正正見到更加震撼。阿女講話點解社工會帶佢哋嚟呢個公園搵呢一位過來人嚟同佢哋傾，原因就係因為呢一位同佢哋分享嘅過來人，學壞嘅起點就係嗰一個公園，阿女好記得話嗰個人同佢哋講話佢細個就係開始係呢個公園度同人玩，因為當年佢啲家長唔係好識管教，佢哋放咗學可以四圍去玩，所以就係呢個公園度慢慢開始結識到啲唔正當嘅人，慢慢學壞。嗰個來人話開頭都仲覺得好威，可以唔使讀書有人驚佢哋，但係佢自己慢慢就變成經常出入監獄，阿女話最震撼嘅係嗰個過來人同佢哋講，最後佢都係返返嚟呢個公園露宿，阿女話覺得嗰個人嘅一生好似就係嗰個公園開始亦都喺嗰個公園結束。社工同佢哋講話會帶壞佢哋嘅人，總係只會講俾佢哋聽好嗰面，但係而家呢一個活動就係要佢哋認識到只要掂毒品最後嘅結果好可能就係喺嗰個公園入面見到嘅情況，咁呢個活動就係用嚟警惕佢哋要小心帶眼識人亦都要遠離毒品。

講真有邊一個父母會唔提醒自己嘅仔女要小心識朋友，亦要遠離毒品。但係我哋好多時做家長嘅都只係用把口去提醒自己嘅仔女，所以我就覺得阿女學校今次搞呢個活動非常之有意義，冇嘢畀親身見到更加震撼，阿女仲話喺個活動入面仲帶咗佢哋去美沙同中心附近去睇，社工仲解釋畀佢哋聽點解啲人要去飲美沙酮。佢話其實都知道毒品嘅禍害但係今次親眼見到佢覺得印象非常深刻，連阿女自己都講話呢個活動令到佢更加警惕毒品㗎禍害，同埋更加之道基層生活嘅情況。

可能有啲家長會覺得帶啲細路仔去呢啲地方會唔會有危險呢？需唔需要咁親身去經歷呢？但我就覺得呢個活動好有意義，同埋講真學校帶得細路仔出去睇嘅嘢其實學校要擔心嘅嘢可能仲多，佢哋都可以安排得嘅活動一定係計過度過認為安全同埋有意義先至搞。我就希望學校可以間唔中就攪吓呢啲活動，等而家嘅細路仔可以多啲了解社會另一面嘅情況。