瑯琊榜：書同劇都好睇，劇還原大部份書嘅重要場景同對白，唔同在於書入面宗主同郡主冇感情線，劇就改咗郡主一直都愛宗主，雖然最後兩人不能白頭，但感情更深刻。
楚喬傳/11處特工皇妃：因為劇到宇文玥（諸葛玥）沉入湖底就完，只好睇書睇埋結局，後面情節有部份不合理，但總算係圓滿講咗所有人嘅結局。
杉杉來了：書比劇簡單，杉杉純粹一個愛吃又思想單純嘅傻白甜，唔似劇入面最後有點小心思，書嘅封騰有魅力好多，專一不拖泥帶水。
步步驚心：書個結局慘好多，冇穿越返去現代，若曦死咗就係死咗，男女主結局遺憾更多。
我只喜歡你：書比較簡單，作者自傳式寫法，幾有趣，劇加入更多人物同轉折。
御賜小仵作：劇好睇好多，劇情合理，人物討喜，書嘅案件架構完整同合理過劇，劇中細節好多係靠巧合，但綜觀係劇改編得成功，否則按書去拍就死得。
親愛的‧熱愛的/蜜汁燉魷魚：書簡單好多，亦幾甜，劇太多回憶，太多加插人物同情節，節奏時快時慢，個人較喜歡原著小說。
三生三世十里桃花：劇疏理清楚時間線同人物關係，書係穿穿插插，有點一頭霧水。
烏雲遇皎月：書係非常好睇，寫法都幾新鮮，男女主角一人一章以自身角度去推進故事，劇我一集都睇唔完，真係太惡頂，金瀚同烏遇人物形象完全唔夾，見到女主望住佢花痴果樣真係隔夜飯都嘔埋出嚟，女主應該係精緻得嚟有少少脾氣又聰明，李一桐唔太似，我心目中男女主係王子文同王凱。
他來了，請閉眼：書嘅情節完整，人物性格背景交待得好清楚，劇嘅男主揀霍建華絕對夾，但女主馬思純就唔多得，仲改咗個別人物背景同身份，夾硬整個終極大波士出嚟故弄玄虛，攞嚟搞。
如果蝸牛有愛情：書同劇都好，男女主選角適合，劇有部份情節改咗，不過都算勉強可以接受。
你和我的傾城時光：書係好好睇嘅商戰故事，劇改到不知所謂，原本開頭幾有睇頭，點知加咗個新人物，又將部份人物背景改咗，於是男女主智慧忽然降低幾級，所謂嘅商戰小兒科得嚟得啖笑。
你是我的榮耀：書同劇都好睇，書比較冇咁多航天同遊戲細節，但刻劃感情細緻，劇嘅選角到位，但凡唔係楊洋同熱巴都會失色一截。
上陽賦：書好睇過劇，書中男女主都係有野心嘅人，劇就改成兩個愚忠愚孝，劇中好些配角加戲之下變成枝線太多，個人喜歡書多過劇。
花旗太太生活在花旗國，留意時差，你問我未必即時答到。
發表於 
，大部份都有用嘅) 
返回列表
