本人於2020年3月去元朗嘉城 NT Bxxxxy 做針清，留低左疤痕. 美容變毁容.
後來喺美容版左一篇文章想提醒大家唔好去呢間美容院，亦有姐妹留言表示曾經受害.
呢間美容院竟然發信要求移除該文章，聲稱內容失實，並保留追究權利.
我地受害者俾佢整傷啲皮膚，成世塊面留疤都未追究，整傷人果嗰竟話要追究？
當日我覺得自己鼻哥油脂粒多唔知點整，上網一搵就搵到該美容院置頂，貼左一啲針清後唔紅又乾淨嘅照片,聲稱自己針清乾淨又唔傷，仲有好多讚佢嘅comment，話美容師有跟進，手勢又好之類，我以為佢技術好好就去左.
結果該美容師非常大力，非常痛，我信任佢應該係專業所以先忍住，做完後皮膚好紅好傷，我以為過幾日好返就會冇事.
結果最後我鼻哥結咗兩塊好大嘅蕉，成個星期先甩，仲留低凹凸洞疤痕.
我whatsapp 同呢個美容師講，佢竟然問返我轉頭點解會有蕉？仲問我嗰粒係唔係暗瘡？
我返上去搵佢，佢就講東講西講到係我自己皮膚問題，佢話你咁耐唔清，你搵邊個清清完都係會有窿，佢話係因為啲油脂食晒皮膚啲骨膠原，又話知唔知點解馬國明塊面咁多凹凸洞？咪就係因為佢咁耐都唔清囉！
我而家啲油脂粒，自從經過呢件事已經唔敢去美容院，自己搽A醇等佢自己代謝出嚟， 就算等超過大半年我啲皮膚都唔會留個洞..
仲同我講你嗰個窿好細咋喎！
而家係有一個窿，如果清到有窿我點解唔自己清呢？
搵你清就係想清得靚啲唔好有疤痕啫！
又同我講隨着時間會變好. 鬼唔知隨住時間會變淡？
呢個美容師事件發生後完全冇再主動跟進我嘅情況. 亦無任何賠償.
我亦自行前往睇皮膚科醫生.
醫生同我講係一個凸疤同有兩個凹落去嘅細窿. 提議我打激光.
後來我嘗試喺呢間美容院嘅Facebook留言講呢件事,係講唔到嘅,我先發現原來留言佢係過濾過,所以點解之前我見到嘅淨係得好嘅留言.
寫呢篇野係希望唔好再有姊妹受害.
今日我再聯絡呢一個女仔, 呢個女仔仍然係講東講西，將所有嘢推落我身上, 佢話可以係你自己返去護理得唔好. 又話佢嘅針清只係疏通毛孔.
由頭到尾嘅信息：成件事係唔關佢事，唔係佢做成，係你自己皮膚問題.
整傷人嘅反而話要追究呢個係咩邏輯？
奉勸各位姊妹小心，塊面俾啲冇技術嘅9流美容師整到有疤真係咁就一世.
出左事時亦只會語言藝術，捩橫折曲. 保住佢自己同佢盤生意.
發表於 
返回列表
