同老爺奶奶姑奶一齊住左兩年,由我同老公開始計劃要買樓搬出去,到依家搞掂等收樓,奶奶日日都比說話我聽,有d幾好笑,分享下
計劃買樓
「做咩要搬出去呀?依家D樓咁貴,又唔係無位比你地住,以前200呎住5個人都係咁啦,依家……….下略1千字解釋比我聽,無論幾多人迫埋係一間屋都係生存到,係唔會死o既」
「買樓呀,好呀,買黎租比人,繼續係度住」
「兩個人搬出去好悶架,到時你兩個你眼望我眼,可能一個月後就會搬返黎,我執乾淨等你地」
睇樓階段
「二手樓好多凶宅架,又唔知上手咩人住過,住左入去無運行,住左入去會週身病痛。」
「唔好搵d有神位架,好麻煩架(明明佢自己都有安神位)」
「唉呀,你有無問清楚個老人家點過身架?唔好揀d病死架,老死就無問題,最好就搵D一家大細仲健在架啦。」
「30樓太高,9樓太低,依家住19樓最好,搬咩姐」
落訂階段
「叫佢(賣家)減價,唔減唔好買,有咩理由唔減價架,點都要減d呀!」
「問清楚個老人家點走啦,病死就大吉利是囉,啋」
「點解會賣樓架?係咪生意失敗,住得好好地點解要賣樓,可能風水唔好,唔講清楚點解要賣樓就唔好買!撻訂就撻訂啦」
等收樓階段
「租比人啦,我幫你搵租客」
「我搬埋去同你地一齊住,煮飯比你地食」
「阿仔,你會唔會唔比我上去訓架?唔會o既,我個仔最錫係我」(自問自答)
「你放工唔洗煮飯,我買餸去你地度煮,老豆(老爺)阿妹(姑奶)上黎陪你地食飯,熱鬧d」
「唔好請工人呀,請工人不如請我啦,比錢我賺好過啦,我帶埋阿b(大姑奶個仔)去你地度湊,讀你地樓下間幼稚園咪得囉」