少年成長今日: 0|主題: 15864

收藏本版

回覆發帖

返回列表

跳至頁

查看: 34618 | 回覆: 2

爸爸獨有的責任 [複製鏈接]

csir3290

子爵府

積分: 11022

1^#

發表於 24-1-21 11:21 |只看該作者 |倒序瀏覽 |打印

曾幾何時聽過啲上一輩嘅人講養育細路仔要「男孩平養女孩貴養」，意思大意就係話男仔因為要訓練佢哋嘅恆心毅力，所以自細唔可以畀佢哋咁好享受；相反女仔就因為擔心佢哋第二時會容易畀人呃，所以喺佢哋細個嘅時候盡量就要畀佢哋經歷乜嘢叫做好嘢，將來長大嘅時候就唔會咁容易比男仔呃。但係今時今日，個個家庭都係生一個半個，所以仲邊會有話男仔就要平女仔就要貴養呢！總之有細路仔，個個父母都係盡力畀最好嘅嘢佢。好似早兩日同阿仔阿女去買鞋預備過年，我先至話佢兩個返學上體育堂嗰對運動鞋都貴過曬我同老婆平時啲返工鞋。時代唔同，我哋以前返學上體育堂就著白飯魚，佢哋而家嗰對波鞋貴到我都唔敢相信。所以時代真係唔同咗。

但係另一方面，男孩平養女孩貴養呢句說話，其實有啲概念我都仲係認同。唔係用錢多用錢少嘅問題，反而係到而家我都覺得要自細裝備阿女，等佢第二時大過唔好咁容易好似俗語講「受男仔溝」，要等佢早啲有概念乜嘢先至係好男仔。其實喺呢方面我覺得爸爸嘅角色係非常之重要嘅，當然唔係話爸爸搵幾多錢嘅問題，反而係對於女仔嚟講，爸爸其實係一個塑造佢哋將來搵男朋友形象嘅一個榜樣。做父母梗係希望將來個女搵到個好歸宿，咩叫做好歸宿當然係顧家脾氣好做嘢有責任感嘅男仔啦。咁呢方面其實我覺得爸爸對個女嘅影響係非常之重要。好簡單個女見到爸爸每一日點樣對自己嘅老婆，如果看到媽媽係覺得開心而且生活覺得美滿。咁其實潛移默化到將來佢哋長大，佢哋都會傾向搵呢一種形象嘅男仔做對象。另一方面，我覺得好重要嘅就係要畀個女感受到乜嘢係愛，呢個亦都要喺爸爸身上睇到同感受到，如果感受到真正嘅愛，就好似幫佢加咗一個防護罩咁，冇咁容易要向外尋找愛。曾幾何時都聽過教書嘅朋友講，喺佢哋啲band3學校，好多時都會見到一個惡性循環發生，就係有啲女學生自細唔係好得到家庭嘅照顧，又感受到家庭嘅愛，所以慢慢就學壞，好快就會同街外面嘅男仔一齊所謂拍拖，為咗逃離屋企同尋找被愛的感覺，跟著就好容易會跟咗個男仔，好多時就咁畀人搞大個肚，但係喺呢啲環境出世嘅bb，當然亦都好大機會得唔到好嘅照顧，最後呢啲細路仔嘅長大又係重滔覆轍好似自己嘅媽媽一樣。我啲老師朋友講話喺一啲咁樣背景成長嘅細路仔，好容易就會跌入咁樣嘅循環入面，所以家庭環境畀細路仔感受到嘅愛係最好嘅防護罩，最能夠保護佢哋免受外邊嘅引誘，我啲老師朋友成日都講，如果喺屋企搵唔到愛，細路仔尤其是係女仔就會好容易為咗搵到愛而隨便接受男仔嘅追求。另一方面對於男仔嚟講其實爸爸嘅形象就係幫佢哋植入將來照顧屋企同埋成為一個有責任感男仔形象嘅榜樣。

所以爸爸千祈唔可以睇輕自己嘅責任，千祈唔好以為爸爸只係賺錢養家就可以，其實佢對仔女嘅影響可以係好深遠，所以做爸爸除咗賺錢養家之外，仲要好好發揮作為父親對仔女性格發展嘅幫助。