少年成長今日: 0|主題: 15864

收藏本版

回覆發帖

返回列表

跳至頁

查看: 25149 | 回覆: 3

選校的諗法 [複製鏈接]

csir3290

子爵府

積分: 11022

1^#

發表於 23-7-30 11:51 |只看該作者 |倒序瀏覽 |打印

講開阿仔小學畢業當然要講下佢派學校啦！其實阿仔今次派出嚟嘅結果係我哋嘅第一選擇，而且都係非常之好嘅學校，令到我同老婆都放心曬。不過雖然派出嚟咁好，但係其實我哋知道阿仔就唔係咁鍾意。因為而家派出嚟嘅呢間中學唔係阿仔最鍾意嘅學校，阿仔最想嘅就係派埋去同家姐同一間中學，所以喺自行分配學位階段嘅時候，我哋都係先幫佢報家姐間中學，但係喺嗰個階段佢只係後備，學校最終冇收到佢。去到大抽獎階段，我哋就接受咗阿仔班主任嘅建議，因為阿仔間小學同另外一間中學係直屬關係，阿仔嘅成績應該如無意外係可以派到嗰間中學。嗰陣時我哋都有同阿仔解釋，因為要安全同埋佢班主任都建議，而嗰間中學亦都係區入面最好嘅中學，仲係坊間所講嘅band 1A嘅學校。而且阿仔間小學同呢間中學係有直屬關係，所以佢哋最好成績嘅學生只要肯揀都多數都會派到。而家姐嗰間中學，雖然喺區入面都係一間好嘅中學，但係因為同阿仔間小學冇聯繫，所以要同整個區入面嘅其他成績好嘅小學生一齊爭，咁所以最後我哋都係聽班主任嘅意見寧願穩陣啲，而且而家呢間中學嘅成績亦都畀家姐嗰間仲要稍為好一啲添。

派咗出嚟之後我同老婆都放心曬，但係我個仔就成日都話早知點解唔幫佢揀家姐間學校，因為佢覺得佢而家係派第一志願，即係話只要佢肯揀家姐間中學都會係第一志願派到畀佢。但係連阿仔嘅班主任都唔建議我哋咁揀，因為受制於我哋唔知道個隨機number，所以揀冇直屬關係嘅中學可能會冒險一啲。阿仔雖然派咗第一志願但係其實佢唔係咁開心，所以到最後我哋都幫阿仔扣門，扣番家姐間中學，但就連呀仔班主任都勸佢唔好，因為佢而家派到間係band 1a嘅學校竟然走返轉頭去扣一間band 1b嘅中學。但係既然阿仔都唔心息，所以到最後我哋都同佢一齊去叩門，而且亦打算如果收阿仔嘅話，都會幫阿仔轉返去同家姐一齊。當等緊叩門結果嘅時候，我哋其實都有同阿仔解釋下，幫佢調整下佢心情，因為佢而家派出嚟嘅結果係區入面最好嘅中學，連所謂嘅全港排名，呢間中學都係前列，所以就算叩門唔成功，我哋都同阿仔講佢應該應該開心咁去接受而家呢個結果。其實一路同佢解釋阿仔都慢慢接受，但係阿仔可能都仲有一絲希望等緊叩門結果，我哋知佢好心急，好多時我哋放工返到屋企開門，第一件事佢就問我哋有冇收到電話，當我哋每一次話冇嘅時候都見到佢有一啲唔開心嘅眼神。但係可能慢慢佢都接受，其實隔咗幾日收唔到消息大家都知道叩門應該唔成功。而家呢幾日我哋都慢慢同佢解釋，佢亦都開始慢慢接受。到最後去到買校服同埋書嘅時候，佢就真真正正接受自己將要入讀另一間中學唔可以同家姐一齊。

細佬唔鍾意而家派到嘅中學，我同老婆可能都有一啲責任，因為家姐之前升中嘅時候都都有諗過而家細佬派到嘅中學，但係由於嗰間中學成績真係太好而又出名都幾係「chur」嘅學校，所以家姐自行分配學位時都分別有報細佬而家呢間中學同埋而家讀緊嗰間，但係喺自行學位分配學位階段就已經直接收咗家姐，而且家姐入咗之後我哋亦見佢讀得幾開心，而家佢間學校雖然算係成績好但亦都唔算係太「chur」啲學生，所以我哋成日都喺家姐面前都讚佢讀緊間學校，有陣時都會講如果萬一家姐入咗另外一間中學可能冇而家讀得咁開心。所以可能細佬聽埋聽埋就唔係太鍾意而家派到嗰間中學，擔心會讀得辛苦。諗返轉頭可能我同老婆都有責任，因為之後就一心一意諗住細佬都會入埋家姐間中學，點估得到家姐間中學到最後都係唔肯收細佬呢！

所以我都提醒家長如果要幫細路仔搵學校，家長心入面都有一啲可能好想仔女入到嘅學校，所以成日會喺仔女面前講呢啲學校點好，但係都要記住唔好隨便講另外一啲學校嘅壞話，因為到萬一真係事與願違嘅時候，我哋都唔希望自己嘅仔女入去一間佢唔鍾意嘅學校讀書。即係話萬一仔女派唔到家長最想入嗰間佢都唔好懷住唔開心嘅心情入去佢最終要去讀書嘅讀一間學校。明明呢個道理喺家姐升小一嘅時候我自己都明白，所以我哋從來唔會喺家姐面前講想佢入邊間或者唔想佢入邊間學校，就係擔心如果佢真係派得唔好嘅時候佢會讀得唔開心。但係估唔到到細佬升中嘅時候就忘記咗呢個道理，可能我同老婆真係太有信心家姐嗰間中學會收細佬，因為家姐而家間中學成績真係畀細佬而家呢一間中學差少少。

另外亦都唔好以為派得好仔女就一定開心，好似細佬咁，原來先入為主對佢哋真係咁大影響。雖然我同老婆都好開心佢派到而家呢間，但係我哋都冇得迫，因為到最後讀嘅都係細佬，所以細佬想去叩門我哋都同佢一齊去，萬一家姐嗰間學校真係收細佬我哋都預咗會畀細佬入去讀因為咁樣佢最開心。所以有陣時真係冇得勉強。父母要調整自己嘅心情亦都要幫仔女調節佢哋嘅心情咁樣大家先至會開心。就算父母覺得幾好嘅選擇，其實最終都係要仔女接受，所以冇得迫佢接受，做父母嘅只能夠喺佢身邊畀意見最終都係要佢自己作選擇。

0 0 0

私人傳訊回覆引用

sandrafan

男爵府

積分: 6969

2^#

發表於 23-7-31 08:23 |只看該作者

csir3290 發表於 23-7-30 11:51
講開阿仔小學畢業當然要講下佢派學校啦！其實阿仔今次派出嚟嘅結果係我哋嘅第一選擇，而且都係非常之好嘅學 ...

其實由頭到尾，都一定要以小朋友意願行先。畢竟讀六年個個係佢，唔咪家長。
我小朋友黎緊都係升中一，佢係考級頭，屬B1A，但我小朋友就係鐘意一間剛剛中中升為英中既一間B1C學校，開頭一定有好多黎自朋友反對既聲音，我都有動搖過，最後都係跟佢意願，畢竟佢鐘意係好重要，亦都唔會怨我。

私人傳訊回覆引用

YolandaTam

侯爵府

積分: 22051

3^#

發表於 23-7-31 14:12 |只看該作者

本帖最後由 YolandaTam 於 23-7-31 14:14 編輯

sandrafan 發表於 23-7-31 08:23
其實由頭到尾，都一定要以小朋友意願行先。畢竟讀六年個個係佢，唔咪家長。
我小朋友黎緊都係升中一，佢係 ...

同意小朋友意願最緊要。
我女升中嗰陣時佢學校同旗袍女直仲係直屬關係，佢成績係級中間，直升係無問題。
但我覺得佢體育音樂完全唔掂，又唔係喜歡課外活動，小學排擠佢嗰啲人又係直升，建議佢出去搏。
但喺佢堅持直升下我妥協咗，中學六年係好辛苦，但佢心甘情願，高中成績跑咗出嚟， DSE 竟然考齊7科+M2, Best 6 31分（5=5，5*=6），問返佢，佢認為值得，無悔。
事實證明，佢啱我錯。