少年成長今日: 0|主題: 15864

收藏本版

回覆發帖

返回列表

跳至頁

查看: 23910 | 回覆: 1

小學畢業 [複製鏈接]

csir3290

子爵府

積分: 11022

1^#

發表於 23-7-23 09:31 |只看該作者 |倒序瀏覽 |打印

上個禮拜參加細佬嘅小學畢業禮，去到呢個階段所有嘢都已經安頓好曬，細佬總算派咗入去第一志願嘅中學，雖然唔係佢最想入嗰間，因為唔能夠同家姐一齊，但我同老婆都已經放心曬。參加細佬嘅畢業禮，其實都好感動，其一係因為細佬好神秘咁冇話畀我哋聽佢原來可以上台領獎，所以我哋成日以為去到只係睇佢哋上台攞畢業證書，原來佢神神秘秘冇話畀我哋聽想俾驚喜我哋，除咗拎畢業證書外佢今年可以上台嚟拎學業獎，更驚喜係原來佢代表全班喺台上面對住所有人多謝老師同埋學校，真係估佢唔到而家可以咁有自信咁夠膽。因為佢之前話畀我哋聽佢只不過係後備，除非個同學病咗，如果唔係嘅話都冇乜機會可以上台，但原來老師根本就安排咗佢同另外一位同學兩個一齊上台代表致詞，所以非常驚喜！

望住呢個小朋友小學畢業其實都幾感動，望住佢嘅成長好似時間過得好快。記得佢初初入去讀小一嘅時候，日日返學都喺學校門口喊，喊到要社工出嚟接佢喊到出曬名，跟住用咗好多方法先至平安過渡，令到佢喺返學之後差唔多一個月先至順順利利入學校門口冇再喊。跟住又要面對佢開始默書，記得初初小一同佢溫默書簡直係好似打仗咁，開頭溫極都唔記得，又唔合格。溫度連佢自己都發曬忟憎，後尾又係要慢慢降低要求，從小小的進步開始。又係慢慢用方法終於先至可以慢慢克服可以上到軌道。跟住就到佢去到四年班升五年班嘅時候，其實佢一路成績都係普普通通去，到五年班更加唔能夠好似家姐咁入到精英班，其實老師話佢只係差少少，問過佢想唔想入，因為佢啱啱係踏住條界，最後佢都入唔到精英班，開頭我哋都以為佢會有啲唔開心，但係點知讀下讀下佢又越讀越好，可能正正就係因為佢唔係精英班，以佢嘅成績喺宜家嗰班反而可以係前列，所以成功感令到佢越讀越好。連去面試嘅時候，人哋學校都問佢點解六年班嘅成績比五年班進步咁多！

呢個小朋友喺成個小學階段其實都經歷咗唔同嘅問題，但係正正呢個小朋友就話畀我同老婆聽，其實多啲嘅鼓勵多啲嘅成功感反而仲幫助到小朋友成長，呢個小朋友喺成個小學階段我同老婆其實都冇乜話過佢，雖然佢有好多嘅問題，亦有做得唔好嘅地方，但係其實我哋一路都係用鼓勵嘅方法用，多啲讚賞，一路喺身邊支持佢，而家望返轉頭就係呢啲方法幫佢克服一個又一個困難。講讀書其實佢的確係畀家姐讀得冇咁好，所以今日佢有咁嘅成績其實都令到我同老婆好意外，估唔到佢派嘅學校比家姐嘅仲好。有今日呢個成績，其實唔係我哋兩公婆有咩特別方法去教阿仔，反而係我哋兩公婆一直都相信千祈唔好同家姐比較，只有多啲鼓勵同埋支持，幫阿仔建立自信心先係改善佢成績嘅最根本方法。我唔係話為咗要鼓勵佢就乜嘢都要就曬佢，反而係點樣畀時間佢去嘗試，點樣慢慢接受佢逐少逐少嘅改善，幫佢建立自信心，佢讀書冇家姐咁自動自覺，我哋就要幫佢手建立一個有規律嘅讀書方法，當佢慢慢感受到原來自己都係可以做得到，而屋企人亦都一路支持，亦都接受佢有做得唔好嘅時候，咁佢就會慢慢建立自信。

一路走來今日佢已經小學畢業，證明我同我老婆嘅方法都冇用錯，冇錯係需要用多好多時間同埋耐性，更加係訓練我哋兩公婆嘅EQ，但係事實證明我個仔嘅自信的確係畀佢小學一年級入學嘅時候已經增添咗好多，最開心嘅係佢已經搵到一套適合自己嘅讀書方法。而家佢小學畢業，望返轉頭時間好似過得好快，但係當中幫阿仔經歷咗一次又一次嘅難關，仍然印象深刻。今時今日望返轉頭都總算冇浪費到我同老婆一番嘅心血同埋心機。