慶餘年2睇咗頭兩集,嗯。。。又唔係唔好睇,但珠玉在前,有比較之下,又等咗幾年,期望大,失望大,感覺有少少斷層:范閒瘦咗好多,言冰雲換人,其實只係一個小配角換人,粉絲嘈到我以為男主角換人添,唔知以為呢套主角係言冰雲~新演員其實亦唔差,俾人各種批評都幾無奈,缺點係有,演員時常抿嘴小動作有D礙眼,角色性格氣質同第一季有些微分別,第一季言冰雲比較木訥嚴肅,又唔識得轉膊,有點衝動,佢一早俾人盯實,間諜身份曝光,唔係得心儀佢嘅沈小姐相救,死咗九世。第二季言冰雲第一集肯同范閒合作,識得玩小心思,成個人精伶咗,仲有少少幽默感,骨子裡依然係愚忠嘅小言大人,新演員樣其實唔算差,就係身型儀態差少少,有少少寒背鬆腰,呢個喺好多演員身上都出現,反觀以前老一輩演員個個挺腰開胸,身裁管理一個好。不過新一季小言大人依然係愚忠,比第一季話多了點,新演員如果之後改一改講對白時常抿嘴小習慣,應該唔錯。
開場回應之前第一季最後一幕,破綻接唔上,兩個鏡頭對比一下就見到,第一季最後小言一劍由後直拮過去,劍由背後腰插向前,穿過范閒;第二季係兩人背對背,鏡頭相就之下,用一個小機關自圓其說,假死之說真係有D牽強。
另外一眾大佬如慶帝、陳萍萍、范大人聽到范閒死訊後方寸大亂,醜態百出,有點過份搞笑。雖然之前第一季都玩好多笑梗,但當時係幾自然同出人意表果種,今季呢種有少少過份為搞笑而搞笑。驚喜係王啟年老婆同個女,小女孩好可愛,林小娘演王夫人,表面賢慧嫻淑,一個眼神一個動作,大小二王嘅反應非常有戲,原來王家大波士係王夫人。
雖然日日更,但以我老公睇劇速度,最好都係等出晒再叫佢睇,而家我再追一追番第一季先。
孤妖小紅娘月紅篇開播,睇咗第一集,果然楊冪就係演狐仙/妖第一人,顏值當打,身型冇得挑剔,東方月初係佢養大,即時想起小龍女養大楊過,又想起三生三世十里桃花中白淺比夜華大九萬歲,塗山紅紅最少比東方月初大四百歲,東方童年演員幾可愛幾靚仔,楊冪角色表面冷漠無情,其實心懷世間和平,今次造型好靚,就睇下之後劇情改編成點。呢套劇成敗對楊冪、龔俊都有幾大影響。
花旗太太生活在花旗國,留意時差,你問我未必即時答到。