3歲或以上今日: 0|主題: 8584

收藏本版

發帖

返回列表

跳至頁

樓主: Angelanna37

積分: 9115

1^#

發表於 15-11-22 00:24 |顯示全部帖子

回覆：Ms_Phoebe 的帖子

而家好多人鍾意懷疑小朋友自閉或自閉頻譜失調或過度活躍，唔好擔心住，因為呢啲懷疑嘅人好多時都冇資格講呢樣嘢，去政府排期驗最實際，我個仔乜都畀人話過，私家言語治療師又講過一啲似是而非嘅嘢，又話佢可能自閉又話感統失調，我心諗少年你太年輕了，學校學啲乜你冇資格又照噏，其實好唔專業。政府我個仔排咗半年已經有得評估，好大部分係因為佢幼稚園寫咗張表，寫咗一堆感統失調病徵，我睇到眼都凸埋，原來黑心好簡單。算數，我去完評估再講。嗰個評估一做3個鐘，個醫生話佢除咗講嘢有少少遲緩其他冇問題，問我個仔係咪讀某幼稚園，我話係，醫生話嗰間最鍾意轉介啲學生去評估，總之啲小朋友唔係佢個模咁樣佢就話個小朋友有問題，我呢啲第一個小朋友嘅媽媽最易嚇。我將呢個結論同啲懷疑嘅人講（某間有好幾間港島分校嘅私立幼稚園校長，唔開名，你應該估到邊間），嗰個人仲死話政府可能唔夠資源所以格硬話冇事，講真，我有時間同佢玩我告到佢間學校死十次都有之。

至於我個仔講嘢，佢兩歲半連媽媽都講唔到，只係講到幾個中文同英文單字。而家3歲半，多嘢講到叫唔停。發音有待改進，但佢唔係太差，有啲音男仔係要到4歲先講得好，我畀時間佢，同時亦繼續練習，日常生活多提醒佢正確發音。基本上佢而家講嘢大部份人都明，中英文都係，當然有同齡小朋友講得清楚過佢好多，但由乜都講唔出到今日我已經覺得好欣慰。佢而家其實有睇政府言語治療，堂係比較疏，每次半個鐘，主要係教家長返屋企同小朋友練習乜嘢。

講咗咁多，結論係媽媽要辛苦啲做多啲功課，上網又好睇書又好，知多啲唔好畀人抱窒。同埋細路仔嘅發展可以好唔同，呢樣係幫我仔驗耳嘅醫生講，我覺得好啱聽，佢話行路有啲小朋友早啲有啲遲啲，咁係咪遲啲識行嘅小朋友就成世行路都拐下拐下呢？當然唔係。言語發展亦係一樣。遲啲講唔代表個小朋友以後會講得唔好。我明白叫你唔好心急係冇用，因為等我仔開口講嘢嗰段時間其實極漫長同好難受，但同時我希望你對小朋友有信心，佢哋真係唔講唔講，一講可能就進步得好快。

私人傳訊

cwsarahtam

男爵府

積分: 9115

2^#

發表於 15-11-22 09:03 |顯示全部帖子

引用：而家好多人鍾意懷疑小朋友自閉或自閉頻譜失

原帖由 cwsarahtam 於 15-11-22 發表
而家好多人鍾意懷疑小朋友自閉或自閉頻譜失調或過度活躍，唔好擔心住，因為呢啲懷疑嘅人好多時都冇資格講呢 ...

再補充少少，小朋友講嘢遲有時可能係聽唔清或睇唔清，我聽過有小朋友因為嚴重遠視，睇唔到人哋講嘢嘴型係點所以遲遲唔講，一發現有遠視戴咗眼鏡就好快講到好多。呢啲嘢喺私家診所比較難發現，我提到喺政府兒童醫院嘅3小時評估，驗眼驗耳驗體能言語同其他範疇，所以就算等得耐啲，佢發現真正原因嘅機會大過外面診所，亦可以快啲針對性咁改善問題，就算佢要遲開始治療，但都好過估估下行錯方向。我自己搵過私家診所，都讀咗個基礎言語治療師課程，讀完之後發覺其實私家診所比較局限，好多嘢都係靠估，同埋治療師嘅資格都好參差，佢收得貴其實唔代表佢做得好....就算話讀咗學位，理論同實踐始終有距離。