少年成長今日: 0|主題: 15864

收藏本版

回覆發帖

返回列表

跳至頁

查看: 21103 | 回覆: 0

選科唔簡單 [複製鏈接]

csir3290

子爵府

積分: 11022

1^#

發表於 24-3-24 11:41 |顯示全部帖子 |倒序瀏覽 |打印

家姐終於完成第一階段選科，而家要等學期尾考試之後，先至按成績再選多次。今次陪家姐一齊選科先至發覺原來選科有咁多學問。諗返我以前細個中三揀文科理科嘅時候，首先家長唔係好畀到意見，總之就係話我自己決定，咁我自己點決定呢？咁就梗係問同學啦！主要係睇我最熟嘅同學揀乜嘢科，令外當時聽人講話揀理科前途好啲，所以到最後就揀咗讀理科。但係啲人話讀理科前途好啲，我最後就真係唔知究竟點樣好咗，總之就係最熟嘅同學揀乜就揀乜。最後我就係典型發覺自己揀錯科，因為原來自己讀生物化學物理根本就讀得唔叻，反而到考會考嘅時候考得最好嘅科目就係啲文科科目中文經濟呢啲。至於前途就係因為讀得唔好所以都係麻麻地，嗰先發覺原來所謂前途好啲，根本就係你讀得好嘅時候，讀乜前途都會好！同你揀文科或者理科都冇乜太大嘅關係，最主要係你考出嚟嘅成績好定唔好。

就係因為咁，所以同阿女一齊揀科嘅時候，第一樣嘢就係叫阿女千祈唔好只係跟朋友，一定要考慮自己能力同埋興趣。但係喺中三學期初嘅時候，阿女都仲係冇乜概念選科，亦都唔係好知自己有啲乜嘢特別有興趣。到見家長嘅時候同老師傾，老師就更加話其實以阿女讀書嘅能力，讀乜嘢科都冇乜所謂，都係建議佢睇自己興趣，諗吓將來想做啲乜嘢職業，同埋去大學嘅網頁睇下第二時會有興趣喺大學嘅時候讀乜嘢科，然之後就睇下喺中學嘅時候讀邊科會有啲優勢就揀乜嘢科。但係到二月嘅時候再問阿女，但佢都仲係好似揸唔定主意，我就同阿女一齊上去大學嘅網頁睇，再加上同佢用職業嚟分析。

用職業嚟分析，我老婆成日都灌輸一個概念畀阿女，就係當然一定要係專業，不過最好唔好咁辛苦，唔需要輪班工作就最好，我嘅睇法就更加係最緊要嗰門專業唔好咁容易畀電腦ai取代。所以阿女好快就知道佢唔會讀醫，而會計呢！就算阿女鍾意計數都因為擔心呢啲會較容易被電腦取替嘅專業驗唔會考慮。呀女因為鍾意計數所以佢都偏向讀理科嘅科目。之後上大學個網頁再搵吓資料，最終得出一個初步嘅選擇。咁之後我老婆同我都各自再去問下啲教書嘅同學，得出嘅結論係我哋呢一個揀法其實唔算係太理科，因為阿女決定以讀物理治療師為目標，所以就揀咗生物數學延伸(M2)，同埋經濟。揀經濟就係因為希望三個選科入面有一科會讀得較為輕鬆同埋多啲興趣。但係我啲教書同學就話原來咁樣揀法會有啲文唔文，理唔理咁，因為原來數學延伸好多大學都唔當係理科。如果想讀物理治療嘅話點解唔揀埋物理，所以最終就揀咗物理代替生物。

今次經驗發覺原來要認認真真咁去選科真係唔容易，有好多因素要考慮，家長參與其中亦都唔可以淨係由家長主導，家長覺得要仔女將來做乜就要佢揀咩科。認識自己仔女能力好緊要，更加要知道仔女嘅興趣。家長自己就算唔係好認識都好，最好就係同仔女一齊去研究一齊去傾，問多啲人嘅意見，得出一個大家都認為滿意嘅選擇。千祈唔好任得細路自己揀又或者家長自己話曬事。選科對細路仔將來嘅前途其實係一個重要嘅抉擇，所以家長千祈唔可以輕視，亦都要同仔女有商有量，除咗可以得出一個大家都滿意嘅選擇外，亦可以從中建立大家嘅親子關係。